Mukiriya, Hamagara kuri 0783734945 na 0725200315 tukwamamarize ibikorwa

INKURU ZIGEZWEHO

Kuboneza urubyaro bishyigikira iterambere-Madamu Jeannette Kagame.



Yanditswe na MUNYENTWALI Jerome Yasomwe na

Madamu Jeannette Kagame yagaragaje ko gahunda zo kuboneza urubyaro zifite akamaro kanini mu iterambere ry’umuryango kandi ko kongera ubumenyi ku buzima bw’imyororokere ari kimwe mu bigomba kwitabwaho, ibi yabitangaje ubwo yasangiraga n’urubyiruko rwaturutse hirya no hino ku Isi, rwari mu biganiro kuri gahunda zo kuboneza urubyaro byahereye tariki ya 10 Ugushyingo 2018. Ibi biganiro byabanjirije itangira ry’Inama mpuzamahanga ku kuboneza urubyaro irimo kubera hano i Kigali.

Mu butumwa bwe, Madamu Jeannette Kagame, yavuze ko u Rwanda rufatanyije n’abandi bafatanyabikorwa, umubare w’Abanyarwanda bitabira kuboneza urubyaro bagenda biyongera.

Inkuru dukesha Igihe ivuga ko Icyuho cy’abatagerwaho na serivisi zo kuboneza urubyaro cyavuye kuri 40% mu 1992 kigera kuri 19% mu 2015 ndetse abakoresha ubwa kizungu bavuye ku 10% mu 2005 bagera kuri 48% mu 2015.
Yagaragaje ko mu gihe bigaragara ko hari intambwe iri guterwa, hagikenewe izindi mbaraga zirimo kwigisha urubyiruko uko rukwiye kwitwara.

Yagize ati “Guteza imbere gahunda yo kuboneza urubyaro binyuze mu kwigisha ku buzima bw’imyororokere ni ingenzi mu guharanira kugera ku iteramebere ry’imiryango yacu.”
Yahamagariye buri wese gukomeza ubuvugizi kugira ngo abantu bagere kuri serivisi zijyanye n’ubuzima bw’imyororokere.


Madamu Jeannete Kagame ageza ijambo ku bari mu nama

Yagaragaje ko ari uburenganzira bw’ibanze ko buri wese agira amakuru ku buzima bw’imyororokere, akanagera kuri serivisi zo kuboneza urubyaro ku buryo abyara yabyihitiyemo.

Madamu Jeannette Kagame yagarutse ku muryango Imbuto Foundation yashinze, avuga ko ugira uruhare mu gutanga ubwo burezi, by’umwihariko mu rubyiruko, ariko hakanabaho ibiganiro mu bakuze.
Yanagaragaje ko kera hariho imyumvire yo gufata abana benshi nk’ubukire kuri ubu bikaba bidakwiye.

Ati “Imiryango migari ahanini yafatwaga nk’ishema n’igisubizo ku bukungu mu gihe bumvaga ko abana bazita ku babyeyi babo nibaba batakibasha gukora.”
Ati “Kuri ubu hagomba gushakwa igisubizo cyo kuringaniza urubyaro mu guharanira iterambere, hakigwa uko hahuzwa imico n’imyemerere y’amadini irwanya kuboneza urubyaro mu gihe imiryango ifite abana bake ariyo ibasha kubitaho, bakajya mu ishuri ndetse bakabona serivisi z’ubuvuzi”.

Mu cyerekezo 2050 u Rwanda rwihaye, Madamu Jeannette Kagame yavuze ko mu kubaka ubushobozi bushingiye ku bantu, “tugomba kwita ku kibazo cy’ubwiyongere bw’abaturage n’ingaruka bwagira ku ntego z’iterambere.”
Minisitiri w’Ubuzima, Dr. Diane Gashumba, yavuze ko u Rwanda rufite ubushake bwa politiki muri serivisi zo kuboneza urubyaro na Imbuto Foundation ikabishyira mu bikorwa, yigisha ubuzima bw’imyororokere uhereye mu bana b’abakobwa.


Dr Natalia Kanem, umuyobozi nshingwabikorwa wa UNFPA ageza ijambo ku bitabiriye iyi nama.

Umuyobozi Mukuru w’Ikigega cy’Umuryango w’Abibumbye cyita ku Baturage (UNFPA), Dr. Natalia Kanem, yahamagariye za guverinoma, sosiyete sivile n’abandi bafatanyabikorwa gukomeza kwita ku bikorwa byo kuboneza urubyaro.
Dr. Kanem yashimye imbaraga Leta y’u Rwanda yashyize muri gahunda zo kuboneza urubyaro.

Mu gusangira, hatangiwe ubuhamya bw’abantu berekanye ko ubumenyi ku buzima bw’imyororokere ari ngombwa kandi uwasamye inda atagomba gutereranwa.
Umunyakenyakazi Ivanna Waweru Njoki w’imyaka 23, yatewe inda afite imyaka 18 ubwo yakundaga iraha no gusohoka. Akimenya ko yasamye yarihebye ageraho atekereza no kuba yakuramo inda atinya nyina wagiraga amahane yagereranyaga n’aya Hitler.

Yashatse no kuva mu rugo, ariko Umujyanama w’ubuzima bwo mu mutwe aramufasha, aza gutinyuka kubibwira nyina, nawe amutegeka kwemera gusubira mu ishuri, akazamufasha n’umwana we.

Ivanna yarabyaye, afite umwana w’umuhungu kandi yarangije n’amasomo ye ya kaminuza, anashinga umuryango witwa Wezadada Foundation, wita ku babyeyi bibarutse nta bagabo. Yahise afata icyemezo cyo kwifata kugeza igihe azashakira umugabo.





Inkuru Byerekeranye Wakunda


Tanga Igitekerezo

Twibire !
Igitekerezo Cyawe

KWAMAMAZA

Video NSHYA

UBUBIKO

KWAMAMAZA

KWAMAMAZA