Mukiriya, Hamagara kuri 0783734945 na 0725200315 tukwamamarize ibikorwa

INKURU ZIGEZWEHO

Nyamirambo: Kizito Mihigo yakoze igitaramo, akora benshi ku mutima



Yanditswe na MUNYENTWALI Jerome Yasomwe na

Kuri iki Cyumweru tariki 18 Ugushyingo 2018, nibwo umuhanzi Kizito Mihigo yakoze igitaramo cye cya mbere kuva yafungurwa, iki gitaramo n’ubwo kitigeze cyamamazwa kikaba kitabiriwe n’imbaga y’abantu benshi bishimiye cyane kongera kubona uyu muhanzi abaririmbira indirimbo zihimbaza Imana. Muri iki gitaramo kandi Kizito yavuze amagambo yakoze benshi ku mutima.


Kizito Mihigo mu gitaramo cyanyuze abakirisitu benshi n’abandi bamukundira ibihangano bye

Iki gitaramo cyabereye mu Kiliziya ya Mutagatifu Karoli Lwanga i Nyamirambo, Kizito Mihigo akaba yatangiye afatanya na Korali St Augustin yo muri iyi Paruwasi baririmba mu misa, hanyuma misa ihumuje Kizito Mihigo ahita akomerezaho n’igitaramo cye yaririmbyemo nyinshi mu ndirimbo ze zo gusingiza Imana.

Kizito Mihigo weretswe urukundo rwinshi n’abakirisitu bitabiriye iki gitaramo, yababwiye ko yishimiye kuba ari bo ba mbere ataramiye kuva yafungurwa. Uyu muhanzi ariko yanasabye iyi mbaga kumusabira no kujya basabira abantu bafatwa nk’ibyamamare kuko ngo ubuzima babamo buba butoroshye, Kizito ati: "Nimubona umuntu abantu benshi bakomera amashyi mujye mumusabira cyane mumusengere."


Kizito Mihigo yafatanyije na Korali St Augustin muri iki gitaramo

Kizito Mihigo yavugiye muri iki gitaramo ko mbere gato y’uko afungwa, yari asigaye atakibasha no kujya mu misa kubera akazi k’ubuhanzi no guhora mu bikorwa bijyanye na muzika, aho nawe agaya ukuntu ngo yari asigaye ameze nk’icyapa kiyobora abandi cyo kigasigara kuko ngo indirimbo ze zabaga zirimo gukoreshwa hirya no hino mu bitambo bya misa nyamara we atabashije no kujya mu misa.

Kizito Mihigo kandi yashimangiye ko nyuma y’iki gitaramo azakora n’ibindi byinshi birimo icyo azakorera iwabo i Kibeho, mu gace avukamo ariko kakaba kanasobanuye byinshi ku bakirisitu gatolika kubera amabonekerwa yahabereye.

Kizito yanyuzagamo akaganira n’abakirisitu, akababwiriza n’ubutumwa bwibanda ku bukirisitu, amahoro, gusaba no gutanga imbabazi n’izindi nkingi zifasha abakirisitu gukomera mu kwemera. Yavuze kandi ko amasengesho bamusengeye ubwo yari afunzwe yayumvaga amugera ku mutima, ibi byose bikaba byazamuye imbamutima z’abitabiriye igitaramo cye.

Isoko:Ukwezi.com





Inkuru Byerekeranye Wakunda


Tanga Igitekerezo

Twibire !
Igitekerezo Cyawe

KWAMAMAZA

Video NSHYA

UBUBIKO

KWAMAMAZA

KWAMAMAZA