Mukiriya, Hamagara kuri 0783734945 na 0725200315 tukwamamarize ibikorwa

INKURU ZIGEZWEHO

Burera: Minisitiri w’Intebe Ngirente yemeye gushakira umuti ibibazo by’abaganga b’Ibitaro bya Butaro



Yanditswe na Uzabakiriho Jean Gabriel Yasomwe na

Minisitiri w’Intebe Dr.Ngirente Edouard yemereye ubuvugizi abaganga bakora ku bitaro bikuru bya Butaro biherereye mu Karere ka Burera, mu kuvugutira umuti ikibazo cyo kubura amacumbi kibugarije, hakubakwa n’amashuri abanza abana babo n’abandi bahaturiye bazajya bigiramo.

Yabibemereye kuri uyu wa 23 Nzeri 2019, mu ruzinduko yagiriye mu Karere ka Burera, ubwo yasuraga ibikorwa by’iterambere gafite birimo iby’uburezi, ubuzima, ubucuruzi n‘ibindi, areba imikorere y’izi nzego, ibibazo zifite n’uburyo byakemurwa.

Nkuko iGIHE cyabyanditse, ubwo Minisitiri w’Intebe Ngirente yasuraga ibitaro bya Butaro akerekwa serivisi zihatangirwa zirimo no kuvura kanseri, yagiranye ikiganiro kigufi n’abaganga bamugaragariza zimwe mu mbogamizi bagifite, zirimo kutagira amacumbi hafi yabo no kutagira amashuri abana babo bigamo.

Uhagarariye abaforomo n’ababyaza, Dushimimana Emmanuel, yagaragarije Minisitiri w’Intebe imiterere y’iki kibazo n’ingaruka kibagiraho.

Ati “Kugeza ubu abadogiteri nibo bonyine bafite amacumbi hano, ariko abaforomo bo bakora bataha kandi hano hafi ntiwabona inzu yo gucumbikamo, usanga bakora urugendo rw’ibirometero bine kugira ngo babone nibura aho bacumbika."

"Aha kandi ntibabona aho abana babo biga mu gihe bageze mu myaka yo gutangira ishuri, ibi bituma benshi bacika intege zo gukomeza akazi bagahitamo kugasezeraho kubera imvune zirimo. Ariko mudufashije iki kibazo kigakemuka, imikorere yacu yaba inoze kurushaho.”

Nyirabagabe Valentine na we yagize ati “Hafi aha ntiwabona inzu nziza irimo sima, ifite amazi, mbese isukuye. Nk’ubu njye bituma nkora ntaha mu mujyi wa Musanze, usibye n’icyo abana bacu ntibabona uko biga kuko nta shuri ribanza rihaba, ni ikibazo kitwugarije pe! Kibonewe umuti twabohoka mu kazi kacu.”

Minisitiri w’Intebe yabemereye ko ibyo bibazo ubuyobozi bugiye kubivugutira umuti , bigashyirwa mu bikemurwa ku buryo bwihutirwa.

Ati “Iki kibazo iyo mutakimbaza njye nari kukibibariza kuko kiri mu byo nahise mbona, biragaragara ko hafi aha hataboneka amazu meza yo gukodesha, aha hamaze kuba umujyi, tugiye kwicara hamwe tubiganireho n’Akarere iki kibazo gishyirwe mu byihutirwa byo gukemura, kuko kuba nta shuri riba hafi aha nabyo ni ikibazo kigomba gukemuka byihutirwa, turakiganiraho kandi kirakemurwa vuba.”

Muri uru ruzinduko Minisitiri w’Intebe Ngirente yari aherekejwe n’abaminisitiri barimo Minisitiri w’ubuhinzi n’ubworozi, Dr Mukeshimana Geraldine, Minisitiri w’ubucuruzi n’inganda, Hakuziyaremye Soraya n’abayobozi bo mu Ntara y’amajyaruguru.

Yanasuye ibikorwa by’Ikigo gishinzwe guteza imbere ubuhinzi n’ubworozi, RAB, mu Murenge wa Rwerere, Ishuri ry’Imyuga n’Ubumenyi ngiro rya Kabona, Burera Resort, Ikaragiro ry’amata ryagize ibibazo rikaba ritagikora n’ahandi.

Biteganyijwe ko uruzinduko arukomereza mu Karere ka Rulindo kuri uyu wa Kabiri, aho azatangiza ku mugaragaro igihembwe cy’ihinga B, ku rwego rw’Igihugu.





Inkuru Byerekeranye Wakunda


Tanga Igitekerezo

Twibire !
Igitekerezo Cyawe

KWAMAMAZA

Video NSHYA

UBUBIKO

KWAMAMAZA

KWAMAMAZA