Mukiriya, Hamagara kuri 0783734945 na 0725200315 tukwamamarize ibikorwa

INKURU ZIGEZWEHO

VIDEO: Umunyamakuru Theo w’umubavu yaburanye, asabirwa gufungwa by’agategano



Yanditswe na MUNYENTWALI Jerome Yasomwe na

Kimwe mu byaha 2 yari akurikiranweho nticyaregewe urukiko, umwunganizi we avuga ko n’igisigaye nta shingiro gifite, ubushinjacyaha bwo bwamusabiye igifungo cy’agateganyo.

Urubanza, rwatangiye ku isaa 9h00 zuzuye za mugitondo. Mu gihe imirimo y’inkiko yari yarabaye ihagaze, imanza zimwe na zimwe zihutirwa zigacibwa hifashihsije ikorana buhanga rya Video comference, kuri iyi nshuro, iburanisha ryatangiye kubera mu ruhame uregwa, abamwunganira, abashinjacyaha, abacamanza n’umwanditsi w’urukiko bose bari imbonankubone mu cyumba cy’iburanisha.

Icyakora byabaye ngombwa ko mu rwego rwo kwirinda icyorezo cya corona Virus, abaturage bashaka kumva imigendekere y’imanza bahezwa mu cyumba cy’urukiko.

Ni nako byagenze ubwo urukiko rw’ibanze rwa Kagarama ruri mu karere ka Kicukiro rwatangiraga kuburanisha ku ifungwa n’ifungurwa, umunyamakuru Theoneste Nsengimana, uyobora ikinyamakuru cyandikira kikanatangaza amashusho hifashishijwe ikoranabuhanga Umubavu.com / TV.

Uyu munyamakuru yari aherutse gutabwa muri yombi mu Karere ka Gasabo, umuremge wa Kimironko mu kagali ka Nyagatovu, akekwaho ibyaha 2 birimo –Kwigomeka ku byemezo bya Leta yashyizeho byo kurwanya icyorezo Corona Virus, no Kwihesha umutungo wundi muntu hakoreshejwe uburiganya.

Aburana ku ifungwa n’ifungurwa ry’agateganyo kuri uyu wa 07 Gicurasi 2020, ubushinjacyaha bwumvikanye mu rukiko bumushinja icyaha kimwe rukumbi, aricyo Kwihesha umutungo w’undi muntu hakoreshejwe uburiganya.

Imbere y’inteko iburanisha yari igizwe n’abacamanza 2, Me. Armand Intwazayamugabo wunganira umunyamakuru Theoneste Nsengimana yavuze ko uwo yunganira aregwa icyaha kidafite ishingiro, kuko ntaho gihuriye n’ibyaha biteganywa kandi bigahanishwa ingingo y’174 na 230 z’itegeko no 68/ 2018 ryo kuwa 30/08/ 2018, riteganya ibyaha n’ibihano muri rusange.

Yabwiye urukiko ko hari ubwoko 2 bw’ibyaha burimo ibyaha bikorerwa Leta, uregwa ashobora gukurikiranwaho na leta n’undi muturage wese hifashishijwe ubushinjacyaha, ndetse n’ibyaha bikorerwa hagati y’abantu 2, aho ukurikirana icyaha agomba kuba ari nyiri ugukorerwa icyaha (Victime), Me. Armand avuga ko icyaha Umunyamakuru Theoneste Nsengimana akurikirwanweho kiri mu bwoko bwa 2.

Kuri iyi ngingo umwunganizi w’uregwa avuga ko nta hantu na hamwe, bwana Nshuti Marcel, umunyarwanda ukomoka mu karere ka Kicukiro mu murenge wa Kigarama ubu uba mu Bufaransa,yigeze aregera urukiko ko Umunyamakuru Theoneste Nsengimana yihesheje umutungo we yifashishije uburiganya.

Nkuko byasobanuwe n’umucamanza kandi ubushinjacyaha bukaba bwarabiregeye, ngo bijya gutangira, Umunyamakuru Theoneste Nsengimana yari yagiye gutara inkuru y’itangwa ry’inkunga z’ibiryo byagenewe abaturage muri iki gihe Igihugu kiri mu ngamba zo guhangana na Covid 19, iyi nkunga ingana na toni 10 z’ibiribwa yari yatanzwe na Nshuti Marcel uba mu bufaransa, nyamara uyu munyamakuru ngo yagaragaje ko iyi nkunga itageze neza kubo yari igenewe bitewe n’uburiganya bwaba bwarabayemo.

Me. Intwazayamugabo wunganira Theoneste yavuze ko iyi nkunga yerekeje mu karere ka kicukiro mu murenge wa Kigarama yatanzwe na Nshuti Marcel ayinyujije ku muntu witwa Alexis, icyakora akaba yari yasabye uyu Munyamakuru Theoneste kumukorera inkuru igaragaza imitangirwe yayo muri uwo murenge, inkuru yarakozwe inashyirwa ku rubuga rwa Youtube rw’umubavu TV kuya 04 Mata 2020 nyiri ugutanga inkunga arayibona.

Ngo nyuma yo kubona ko itangwa ryayo ryajemo uburiganya, ntabone n’abaturage bavuga ko bafashijwe, byabaye ngombwa ko ateganya indi nkunga y’amafaranga nayo yagombaga gucishwa kuri Alexis, ariko noneho akabona amajwi y’abaturage bagaragaza ko yabagezeho.

Aha rero niho umunyamakuru Theoneste yafatiwe agashinjwa kuba yaragiye koshya abaturage b’akagali ka Nyagatovu mu murenge wa kimironko ho muri Gasabo , abasaba ko bavuga ko babonye ku nkunga yaba yaratangiwe mu karere ka Kicukiro muri Kigarama, bityo ubushinjacyaha bukavuga ko yari agamije kubakoresha uburiganya no kubahimbisha inkuru ku nkunga batabonye ndetse itaranatangiwe mu karere kabo.

Aha Me. Armand Intwazayamugabo, yabwiye urukiko ko inkuru ubushinjacyaha buvuga ko umunyamakuru Theoneste yari agamije gukora yari yarakozwe mbere y’ibyumweru 2 , kandi ko yabonwe na buri wese wasuye urubuga rwe, kandi ko nanubu ikiriho ifite umutwe ugira uti “Byakomeye: kawunga igenewe abaturage birakekwa ko bayirigisa amayeri yaba akoreshwa” kandi ko imaze kurebwa n’abakabakaba ibihumbi 8, ngo iyi nkuru si impimbano kuko yavugishijwemo umuyobozi w’umurenge wa Kigarama n’ushinzwe imibereho myiza y’abaturage wawo bombi bakanyuranya ku merekezo yaho iyo nkunga yaba yaratanzwe, ibi bigashimangira ko inkunga yaba yaratanganwe amanyanga, asaba urukiko narwo kuyireba bityo ko ruzasanga ubushinjacyaha buvuga ko aribwo yari agiye gukora iyi nkuru yo muri Kicukiro nta kuri kurimo, kuko iyi yari yarakozwe mbere.

Me. Armand yavuze ko mbere y’uko umunyamakuru Theoneste avugisha abatugare yabanje kubasobanurira ko n’ubwo inkunga bagiye gushima itarabageraho iza kubageraho nyuma kandi ko itanzwe na Nshuti Marcel, umunyarwanda uba mu Bufaransa, ngo ntiyigeze abasaba guhindura umwirondoro wabo ngo uve muri gasabo ngo ujye muri Kicukiro, bityo ko atiyitiriye umutungo wundi akoresheje uburiganya.

Yavuze ko uyu munyamakuru yagombaga gutanga amafaranga ye ubundi akaza kuyasubizwa na bwana Marcel wari umuterankunga w’aba baturage.

Asobanura ko abatangabuhamya bose ariko babwiye ubugenzacyaha, kandi ko na Nshuti Marcel atigeze aregera ko uyu Munyamakuru yiyitiriye umutungo we mu buriganya. Yasabye urukiko gushishoza rwasanga Marcel atarereze uwo yunganira akarekurwa, akisubirira mu mirimo ye kuko atabona impamvu z’ifungwa rye.

Ubushinjacyaha bwafashe Ijambo bushimangira ko koko Bwana Nshuti Marcel atigeze atanga ikirego ku Munyamakuru Theoneste Nsengimana ariko ko icyaha ari Igikorwa cyose gikorwa binyuranyije n’amategeko bityo ko uyu Munyamakuru yakoze icyaha buri muntu wese yamukurikiranaho.

Bwavuze ko inkunga igenerwa abatishoboye idahabwa umuntu wo mu itangazamakuru ngo ayikurikirane bayibone babanje gufatwa amajwi n’amashusho. Bityo ngo ayo ni amanyanga uyu munyamakuru yakoze, bwasabye ko uyu munyamakuru yafungwa by’agateganyo mu gihe cy’iminsi 30.

Me. Armand Intwazayamugabo, umwunganira yasabye ko urukiko rwazirikana amagambo y’ubushinjacyaha bwemeye ko Nshuti Marcel atareze,ibi abihuza n’ingingo ya 4 y’itegeko mpanabyaha ry’u Rwanda ibuzanya igenekereza mu manza nshinjabyaha nk’izi.

Yashinmangiye ko nirukoresha ubushishozi bwarwo, ruzasanga uyu Munyamakuru icyaha 1 ashinjwa nta shingiro gifite, bityo ko yarekurwa akisubirira mu nshingano ze z’akazi nk’umunyamakuru ufite umwirondoro uzwi kandi unafite umuryango areberera.

Nyuma yo kumva impande zombi, Urukiko rwapfundikiye urubanza ku ifungwa n,ifungurwa ry’uyu Munyamakuru, umwanzuro uzasomwa ku ya 14 Gicurasi 2020 isaa 2h00 z’amanywa mu rukiko rw’ibanze rwa Kagarama.





Inkuru Byerekeranye Wakunda


Tanga Igitekerezo

Twibire !
Igitekerezo Cyawe

KWAMAMAZA

Video NSHYA

UBUBIKO

KWAMAMAZA

KWAMAMAZA