Mukiriya, Hamagara kuri 0783734945 na 0725200315 tukwamamarize ibikorwa

INKURU ZIGEZWEHO

Igabanyuka ry’abakerarugendo, igihombo cya Miliyari 2$ kuri Uganda



Yanditswe na UZABAKIRIHO Jean Gabriel Yasomwe na

Nyuma y’ibihombo Uganda ikomeje guhura nabyo mu nzego z’ubukungu zitandukanye ahanini kubera ubucuruzi butakifashe neza hagati yayo n’u Rwanda ndetse n’ingaruka z’icyorezo cya Coronavirus, kuri ubu iki gihugu cyatangaje ko gishobora guhura n’igihombo gikomeye mu bukerarugendo kigera kuri miliyari 2$.

Kuba Uganda izahura n’igihombo gikomeye mu bijyanye n’ubukerarugendo byagarutsweho bwa mbere na Perezida Museveni muri Kamena ubwo yagezaga ijambo ku Banya-Uganda ababwira uko icyorezo cya Covid-19 gihagaze muri iki gihugu.

Iki gihe Museveni yavuze ko Uganda izahomba arenga miliyari 1$. Ati “Kugeza ubu uyu mwaka Uganda izahomba miliyari 1.6$ biturutse mu bihombo mu bukerarugendo.”

Mbere y’uko Perezida Museveni avuga ibi mu kwezi kwari kwabanje Ikigega Mpuzamahanga cy’Imari, IMF cyari cyatangaje ko amafaranga Uganda ikura mu bukerarugendo kuva azagabanuka ku kigero cya 54% (kuva muri Nyakanga 2019- kugera Kamena 2020), IMF yari yavuze ko kandi mu mwaka uzakurikiraho nabwo azagabanuka ku kigero cya 52%.

Minisitiri w’Ubukerarugendo muri iki gihugu, Godfrey Ssuubi Kiwanda, yabwiye Bloomberg ko Uganda izahura n’ibihombo bya miliyari 2$ yagombaga kuzaturuka mu bukerarugendo, ahanini bitewe n’ingamba zashyizweho mu kwirinda Coronavirus zirimo n’izakoze cyane kuri uru rwego rw’ubukerarugendo.

Zimwe mu mpamvu zagarutsweho ni ukuba iki gihugu cyarafunze ingendo z’indege kandi umubare munini wa ba mukerarugendo cyakiraga ari abanyamahanga bavaga mu bihugu nka Leta Zunze Ubumwe za Amerika, u Buyapani, u Bushinwa, u Buhinde ndetse n’ibindi bitandukanye byo ku mugabane w’u Burayi.

Uganda imaze iminsi mu bihombo

Ibi bihombo mu rwego rw’ubukerarugendo rwa Uganda bije bisanga ibindi iki gihugu cyagiye giterwa ahanini n’umubano mubi gifitanye n’abaturanyi.

Kuva ubucuruzi hagati y’u Rwanda na Uganda bwatangira kugenda biguru ntege, impuguke mu bukungu ntizisiba kugaragaza ko Uganda ariyo ibihomberamo cyane.

Muri Mutarama 2020 imibare yagaragazaga ko ibibazo by’umubano biri hagati y’u Rwanda na Uganda bimaze guhombya Uganda nibura miliyoni 75 z’amadolari kuko ibyo Uganda yoherezaga mu Rwanda umwaka ushize byageze kuri miliyoni 173 z’amadolari zivuye kuri miliyoni 250 z’amadolari mu mwaka wa 2018.

Uretse u Rwanda, imibare ya Banki Nkuru ya Uganda, iy’Ikigo cya Uganda gishinzwe imisoro n’amahoro n’iy’Ikigo gishinzwe iterambere ry’ubucuruzi bw’ikawa muri icyo gihugu, igaragaza ko mu ntangiriro za 2020 iki gihugu cyari kimaze guhomba agera miliyoni 454.7$ ahanini biturutse no ku bwumvikane buke ifitanye n’ibindi bihugu mu karere nka Kenya.

By’umwihariko, miliyoni 75.6 z’amadolari Uganda yahombye byatewe no kugabanyuka kwa sima y’uruganda rwa Hima Cement yoherezwaga mu Rwanda, kugabanyuka kw’ibicuruzwa by’uruganda rwa Movit, amabati n’ibindi.

Ibyoherezwa muri Kenya nabyo byaragabanyutse kuko byavuye kuri miliyoni z’amadolari 825 yabonetse mu 2018, zikaba miliyoni 535 z’amadolari mu 2019.

Uretse ibi bihugu bibiri imibare yerekana ko kandi ibyo Uganda yohereza muri Tanzania nabyo byagabanutse aho byavuye kuri miliyoni 91 z’amadolari mu 2018, bigera kuri miliyoni 83 mu 2019.





Inkuru Byerekeranye Wakunda


Tanga Igitekerezo

Twibire !
Igitekerezo Cyawe

KWAMAMAZA

Video NSHYA

UBUBIKO

KWAMAMAZA

KWAMAMAZA