Mukiriya, Hamagara kuri 0783734945 na 0725200315 tukwamamarize ibikorwa

INKURU ZIGEZWEHO

Nyuma y’imyaka 13 muri Amerika, Nziza Désiré yagarutse mu Rwanda atungurwa n’iterambere rya Kigali



Yanditswe na UZABAKIRIHO Jean Gabriel Yasomwe na

Umuntu wese wakurikiraniye hafi umuziki w’u Rwanda mu myaka yo hambere, azi umuhanzi watangiye kumenyekana mu myaka ya 1997 nka Nziza Désiré. Uyu nyuma y’imyaka 13 yibera muri Leta Zunze Ubumwe za Amerika yagarutse mu Rwanda atungurwa n’iterambere igihugu kimaze kugeraho.

Igihe cyanditse ko uyu mugabo waje mu Rwanda avuye i Burundi yatangiye gukorera umuziki mu mujyi wa Kigali, asohora indirimbo zinyuranye nka; Kula Kulipa, N’umujabaga, Inyishyu n’izindi.

Nziza yakunzwe mu Rwanda ndetse n’i Burundi aho avuka. Mu 2005 nibwo uyu muhanzi yari agezweho bikomeye.

Igihe benshi bari batangiye kumenya uyu muhanzi, yaje guhita ajya muri Leta Zunze Ubumwe za Amerika aho yari amaze imyaka 12 n’amezi icumi.

Nziza ni mukuru wa Dr. Claude. Uyu mugabo umaze iminsi agarutse mu Rwanda, yavuze ko yatunguwe bikomeye n’iterambere rumaze kugeraho.

Mu kiganiro na IGIHE, yagize ati”Mu Rwanda harahindutse buri kimwe cyose cyarahindutse, amazu yose yarahindutse n’abantu barahindutse bameze nk’abanyamerika, ibintu byose byarahindutse.”

“Nahoraga mbona amafoto ko igihugu cyahindutse simbyizere ubu nabyiboneye. imihanda yarahindutse, aho nasize ari ibiri ubu ni ine, imodoka, inzu mbega nageze hano ngirango ndarota. Igihugu baragikoze rwose.”

Nziza avuga ko uretse ibikorwa remezo byubatswe, n’uruganda rw’imyidagaduro rwiyubatse ku rwego rwo hejuru yaba ibinyamakuru bikorera kuri Internet, radiyo na televiziyo.

Uyu muhanzi uri mu Rwanda yavuze ko yagaruwe muri Afurika n’ibintu bine, icya mbere kikaba kureba umwana we yabyaranye n’umuhanzikazi w’icyamamare i Burundi witwa Natacha. Bafitanye umwana w’imyaka 14.

Nziza avuga kuri Natacha, yavuze ko bakundanye ariko bikaza kubananira kugumana bigatuma batandukana, kugeza ubu aba bari bamaze imyaka igera ku icumi batavugana nkuko uyu muhanzi abyivugira.

Icyakora nubwo batavuganaga, Nziza ashimira bikomeye Natacha kuba yarareze neza umwana babyaranye kabone ko nk’umugabo atari ahari.

Icya kabiri cyagaruye Nziza muri Afurika ni ugukora ubukwe yitegura gukorera mu gihugu cy’u Burundi mu minsi mike iri imbere.

Icya gatatu kizanye uyu muhanzi ni ugufungura studio ye izaba ifite ishami i Burundi, mu Rwanda ndetse n’i Dallas ho muri Leta Zunze Ubumwe za Amerika.

Icya kane ari nacyo cya nyuma uyu muhanzi yavuze cyamuzanye muri Afurika ni ukumenyekanisha ibihangano bishya afite yanamaze gukora.

Nziza yavuze ko aboneyeho kuza kwamamaza ibikorwa bye muri aka karere, kuko nubwo yakoraga umuziki mwiza kuva mu 2008 yagiye agorwa no kumenyekanisha ibihangano bye muri aka karere.

Avuga ku muziki wo mu karere, Nziza yahamije ko umuziki wo mu Rwanda n’i Burundi ubura umwimerere kugira ngo ugere kure.

Yishimiye uburyo umuziki nyarwanda wakuze cyane, ahamya ko ikintu cyafashije abahanzi nyarwanda ari uko inzego zinyuranye zirimo n’ibigo bikomeye byatangiye gushoramo imari.

Yavuze ko iki aricyo kiri kubura i Burundi, ati”Muraturusha ibyo navuze hejuru, ibigo bikomeye ntibiratangira kwinjira mu muziki ariko n’itangazamakuru ry’imyidagaduro mu Rwanda ryateye imbere.”

Uyu muhanzi yavuze ko nyuma y’imyaka amaze muri Amerika ubu yamaze kubona ibyangombwa nk’umuturage waho.

Icyakora nanone ngo asanga igihe kigeze ngo agaruke ature muri Afurika nubwo yajya atembera ariko nibura azajye aba atuye iwabo ku ivuko.





Inkuru Byerekeranye Wakunda


Tanga Igitekerezo

Twibire !
Igitekerezo Cyawe

KWAMAMAZA

Video NSHYA

UBUBIKO

KWAMAMAZA

KWAMAMAZA